Namibíufréttir

Óhappatala

2010-02-15T18:59:00.001+02:00

Síðasta laugardagskvöld valt pallbíl nálægt Walvis Bay. Hilux eða eitthvað í þá áttina. Allir þrettán farþegarnir slösuðust. Já, þrettán.

Um að gera að nýta ferðina, ekki satt?

Launahækkun

2008-12-29T13:36:00.002+02:00

Skv. frétt í Namibian var tilkynnt um launahækkun æðstu ráðamanna í Namibíu á Þorláksmessu. Munu ráðherrar, aðstoðarráðherrar og þingmenn fá 24 hundraðshluta hækkun á laun sín. Forsvarsmenn helstu verkalýðsfélaga í landinu hafa ekki tjáð sig um þetta enn.

Þjóð í sorg

2008-12-07T21:40:00.002+02:00

Hinn 26. nóvember sl. lést móðir fyrsta forseta Namibíu. Gamla konan, sem gekk undir nafninu Gwakondombolo, var fjörgömul er hún lést. Eins og með marga Namibíumenn er fæðingardagur hennar ekki þekktur með vissu, en álitið er að hún hafi verið um 110 ára þegar hún dó.

Útför hennar fór fram í gær, laugardag, í heimabæ hennar í norður Namibíu. Voru öll gistiheimili í grenndinni upppöntuð.

Aðstoð við Simbabve

2008-12-07T21:37:00.003+02:00

Í Simbabve gaus upp kólerufaraldur fyrir stuttu síðan. Hefur stjórn Simbabve biðlað til alþjóðasamfélagsins að koma til aðstoðar. Ákváðu namibísk stjórnvöld að leggja fram eina milljón Namibíudala, u.þ.b. 14 milljónir króna, til kaupa á lyfjum. Verða lyfin send til Simbabve á næstu dögum.

Bann við starfsmannaleigum

2008-12-04T20:05:00.004+02:00

Hinn fyrsta mars nk. verður starfsemi starfsmannaleiga bönnuð í Namibíu. Er þetta skv. nýjum lögum um atvinnuhætti. Stærsta starfsmannaleiga Namibíu hefur undanfarið sótt mál í dómstólum gegn þessum þætti nýju laganna. Sl. mánudag tapaði starfsmannaleigan málinu fyrir hæstarétti Namibíu.

Álitið er að í Namibíu séu milli 10 og 16 þúsund manns starfandi í gegnum starfsmannaleigur. Sú stærsta hefur milli sex og átta þúsund á sínum vegum.

Skiptar skoðanir eru hvort bannið sé gott fyrir verkafólk. Sumir halda fram að fyrirtæki muni leggja meira á sig að velja gott fólk og að veita því góða þjálfun heldur en gert er í dag. Aðrir óttast að eitthvað af því fólki sem í dag starfar á vegum leiganna muni verða atvinnulaust.

Athygli vakti að einn hæstaréttardómarinn kallaði starfsmannaleigur nýmóðins þrælahald, þar sem litið væri á verkafólk sem hverja aðra vöru til viðskipta.

Olympíubjórleikar

2008-12-04T19:55:00.004+02:00

Namibíumenn eru mjög klárir í að brugga bjór. Því er ekki hægt að neita. Tafel fer þar framarlega í flokki, sem ein af helstu bjórtegundum Ölgerðar Namibíu. Fyrir ekki löngu síðan fékk Tafel gullverðlaun í ólympíuleikum í bjórframleiðslu. Evrópska bjórstjarnan er keppnin kölluð. Eru þeir ósköp stoltir yfir árangrinum.

Enda er mjöðurinn góður.

Namibísk kjarabarátta

2007-09-05T21:36:00.000+02:00

Les í blöðunum hér úti að öryggisverðir stefna á verkfall næsta föstudag. Ef einhver ræðst inn til mín og öryggiskerfið fer í gang, þá reikna ég með að þessir verðir komin innan nokkura mínútna og fórni sér fyrir mig.

Verkfallið átti reyndar að byrja um miðjan síðasta mánuð, en verkalýðsforingjarnir gleymdu að skv. lögum á sáttasemjari að fá tækifæri til að höggva á hnútinn áður en verkfall hefst. Þetta mundist á elleftu stundu.

Kjarabaráttan hér snýst fyrst og fremst um laun. Öryggisverðirnir vilja fá 67% hækkun á tímakaupið sitt. Slatta hækkun ekki satt?

Þar til maður kíkir á upphæðirnar. Þeir vilja fá hækkun á tímakaupi úr 2,09 namibíudölum í 3,50 namibíudali. Ef umreiknað í okkar ylhýru krónur þá er tímakaupið núna 18 krónur og 81 eyrir og krafan hljóðar upp á 31 krónu og fimmtíu aura. Hver vakt er 12 tímar, svo í dag fá öryggisverðir í Namibíu rétt innan við 226 krónur á dag. Þeir vinna líklega sex daga vikunnar, þ.a. mánaðarlaunin eru rúmar 5.400 krónur.

Úff, og þetta er fólkið sem ég geri ráð fyrir að muni leggja líf og limi í hættu fyrir mig ef brotist er inn til mín.

Kannski ég fari að fjárfesta í varðhundi.

Gæludýraást

2007-09-03T21:35:00.000+02:00

Til er lítið þorp í norðurhluta Namibíu sem ber nafnið Onendongo. Þorp þetta er sjaldan í fréttum, ja, ég man nú bara ekki eftir að hafa nokkurn tímann heyrt á það minnst í þau fimm og hálfa ár sem ég hef búið í landinu. En nú varð breyting á.

Þorpsbúar tóku nefnilega eftir nýrri gröf í nágrenni þorpsins. Á gröfinni var kross úr pálmalaufum, sem þykir óvenjulegt þar á bæ. Var mikið velt vöngum yfir hver væri jarðaður þarna, og auðvitað var spurt hvort lát þess sem þarna lægi hefði borið að með eðlilegum hætti.

Lögreglan var fengið með í spilið og eftir nokkurt þjark var ákveðið að grafa upp þetta lík til að fá botn í málið. Kom þá í ljós að einhver hafði grafið hundinn sinn og haft mikið fyrir að veita hundinum sómasamlega greftrun.

Þykir þetta mikið hneyksli og var þorpsbúum ekki skemmt.

Margs ber að varast

2007-08-31T21:34:00.000+01:00

Nokkuð þurrkaástand ríkir hér í Namibíu núna, en lítið rigndi á síðasta regntímabili og hefur það leitt af sér að mörg vatnsból eru tóm. Ein afleiðing af þessu er að dýr eru meira á ferli að leita sér að drykkjarvatni.

Hefur nú ráðuneyti umhverfis- og ferðamála gefið út fílaviðvörun. Fílar drekka mikið vatn, þurfa svona 120-180 lítra á dag, og nú eru þeir mikið á ferðinni. Því hefur fólki í Kaprívísýslu, sér í lagi, verið ráðlagt að halda sig innan dyra eftir að fer að skyggja.

Áætlað er að í Namibíu séu milli 23 og 25 þúsund fílar, en 2004 voru um 16 þúsund fílar í landinu, þ.a. aukningin er mikil. Því hefur fjölgað mikið tilvikum þar sem fílar ráðast á fólk. Fyrir um tveimur vikum tróðst fíll yfir konu nokkra og lést hún í kjölfarið. Konugreyið var víst á leið heim úr kirkju ásamt manni sínum og átti sér einskis ills von.

Maður einn var á leið hjólandi til vinnu snemma morguns þegar hann rakst á fíl, sem reiddist svo að hann kastaði manninum til hliðar. Afleiðingarnar voru heilahristingur, en lífi hélt þó maðurinn.

Fleiri svona sögur heyrast. Síðan er daglegt brauð að fílar skemmi hús, girðingar, vatnsdælur og fleira þar fram eftir götunum.

Í næstu viku mun ráðherra umhverfis- og ferðamála senda frá sér tilkynningu vegna fílavandans.

Leyfi ykkur að fylgjast með.

Hvers virði er farsíminn?

2007-08-31T21:31:00.001+01:00

Fyrir átta dögum þá tók ungur maður sig til hér í Windhoekborg og hrifsaði farsíma af 16 ára stúlku og hljóp á braut. Sá líklega fyrir sér auðveldan ránsfeng.

Þvílík mistök.

Töluverður hópur fólks var þarna á ferli og tók fjöldi þeirra sig til og hófu að elta þjófinn uppi. Eltingarleikurinn barst meira en kílómetra í burtu og þegar þjófurinn kom að stóru uppistöðulóni grýtti hann símanum frá sér, reif sig úr bolnum og stakk sér til sunds.

Sást hvorki tangur né tetur til hans, þó lengi væri beðið.

Nú, átta dögum síðar, kom í ljós að þjófurinn var ekki syndur. Lík hans rak nefnilega að landi í gær, nær alveg á sama stað og hann steypti sér út í lónið.

Hversu mikils virði er farsíminn?

Auðlindagjald á orma

2006-03-11T21:28:00.001+02:00

Hér í Namibíu er ákveðin ormategund talin mikið lostæti. Mopane ormar
nefnast þessar kræsingar. Yfirleitt fer tínslan fram í mars og apríl á
hverju ári og birtist þá sölufólk á útimörkuðum með þetta sælgæti. Ég
hef nú aldrei orðið svo frægur að leggja mér þá til munns. Á kannski
eftir að gera það einhvern tímann.

Hvað um það. Fyrir tveimur dögum, eða svo, birtist lítil frétt í
Namibian sem mér þótti athyglisverð. Konungurinn í Uukwaluudhi, Josia
Shikongo Taapopi, hefur gefið út tilskipun að allir þeir sem ætla að
tína Mopane ormana á hans svæði verða að gjöra svo vel að skrá sig
fyrst á héraðsskrifstofunni í bæ sem heitir Tsandi. Ekki nóg með það,
heldur má ekki byrja tínsluna þar til konungurinn leyfir og einnig
verða tínendur að greiða fyrir forréttindin að tína ormana. Ekki er enn
búið að ákveða hversu há greiðslan verður, en tilkynnt verður um
upphæðina þegar tínslutímabilið hefst.

Uukwaluudhi er lítið hérað innan Omusati sýslu og á öðrum svæðum í
kringum Uukwaluudhi þarf ekkert að greiða fyrir að tína orma. Haft er
eftir ormasölumönnum í Oshakati að ormarnir séu „gjöf frá Guði“ og því
ætti enginn að þurfa að greiða fyrir að tína þá.

Eitthvað minnir þetta mig á fiskinn í sjónum...